Facebook Telegram Twitter Instagram YouTUBE


Baş saife  >  Derc  >  Haberler  >  12 Kiçik ay 2019, 11:02

Rusiye propagandası serial kibi: HSN Kremlniñ informatsion operatsiyaları aqqında kitapnı taqdim etti

2019 senesi fevralniñ 12-de Ukraina haber siyaseti Nazirliginiñ leyhası olğan "2014-2018 seneleri Ukrainağa qarşı mahsus informatsion operatsiyalarnıñ beyaz kitabı" taqdim etildi.

Nazir muavini Dmıtro Zolotuhin haber etkenine köre, Nazirlik Beyaz kitapnı rusiye mahsus hızmetleriniñ ve siyasetçileriniñ propagandasını bir qaç yıldan berli közeterek ve talil eterek yarattı. 

"Rusiye dezinformatsiyasınıñ tarqatılmasını televizion seriallarnıñ yaratılmasınen teñeştirmek mümkün. Eger kinosaannıñ esas merkezleri Amerikadaki Göllivud, İndistandaki Böllivud ve Nigeriyadaki Nolivud olsa, uydurmalar ve yalannı tarqatqan buña beñzer saada lider — Kremlivud demege mümkün", - dep, qayd etti o.

D.Zolotuhin aytqanına köre, rusiye dezinformatsiyasınıñ er bir büyük narativini "mevsimlerge" bölüngen "serialnen" qıyaslamaq mümkün, mında da "serial" içinde çeşit ğayeli kompleksler bar. Er bir ayrı "bölüm" ise mevsim ve serialğa ait olğan bir-de-bir vaziyetni köstere.

"Misal olaraq, "ispanlı dispetçer Karlosnı" er kes bile. Bu dispetçer mediasaada Boeing 777 uçağınıñ tüşürilmesinden soñ peyda oldı. Bu — MH17 reysiniñ faciası aqqında büyük serialnıñ mevsimlerinden biridir, onıñ esas maqsadı — Rusiyeden cinayeti aqqında bütün qabaatnı alıp ta onı Ukrainağa taşlamaq", - dep, añlattı Nazir muavini.

Rusiye tecavuzınıñ başqa serialları arasında: Ukrainanıñ İGİLnen bağı, Ukraina silâlı quvetleriniñ cinayetleri, Donbassta NATO arbiyleri, Ukrainanıñ er şeyde çaresiz olğanı aqqında seriallar ve ilâhre. 

D.Zolotuhin qayd etkenine köre, Kremlniñ er bir feykini red etmek degil de, rusiye bu operatsiyalarnı nasıl etip keçirgeniniñ printsipini añlamaq ve öz strategik narrativini qurmaq kerek. 

"2014-2018 seneleri Ukrainağa qarşı mahsus informatsion operatsiyalarnıñ Beyaz kitabınen" saytımızda tanış olmağa mümkün.


Cedvel