Facebook Telegram Twitter Instagram YouTUBE


 

Baş saife  >  Derc  >  Haberler  >  29 Qural ay 2019, 09:05

E.Ceppar: Qırım haber reintegratsiyasınnı strategiyası işğalniñ menfiy neticelerini de közde tuta

2019 senesi mayısnıñ 24-nde Ukraina haber siyaseti Naziriniñ Birinci muavini Emine Ceppar "İlhaq etilgen Qırım: tış siyaset ve telükesizlik siyaseti" konferentsiyasında Qırım haber reintegratsiyasınıñ Strategiyasınıñ ömürge keçirilmesi aqqında aytıp berdi.

"Qırımnıñ işğali neticesinde Ukraina milliy tele- ve radioyayınlavı sisteması da işğal etildi. Ve bunıñ neticesinde, kün-künden insanlarnıñ fikirleri de zapt etile. Rusiye Qırımda qanunsız şekilde 503 ukrain tele- ve radiodalğalarını qullana. Daa bir cinayet — informatsion meydannıñ mustaqil jurnalistikadan boşatuv, bunıñ neticesinde onlarca jurnalistler ve kütleviy haber vastaları yarımadadan çıqmağa mecbur oldı. İşğal şaraitinde yañı adise — bir çoq siyasiy repressiyalar, taqip etilüvler ve söz serbetliginiñ yoq etilüvine cevap olğan grajdan qarşılıqnı ve grajdan jurnalistikanı basqığa oğratmaq. Bundan ğayrı, Qırımda faal sürette Ukraina aqqında Kremlniñ uydurmaları tarqala. Olarnıñ bir maqsadı bar — Qırımnı Ukrainadan uzaqlaştırmaq içün büyük diskriminatsiya yapmaq. Bularnıñ episi 2018 senesi dekabr ayında Ukraina Ükümetinen tasdıqlanğan Qırım haber reintegratsiyasında qayd etile", - dedi E.Ceppar.

Onıñ sözlerine köre, HSN Strategiyanı böyle yönelişlerde kerçekleştire:

- Herson vilâyetinde ukrain yayınlavınıñ inkişafı;

- buña binayen köntentniñ yaratılması ve er yıllıq kommunikatsion kampaniyalarnıñ keçirilmesi;

- Qırım mevzusında çalışqan haber vastalarına qol tutuv;

- kitaplarnıñ neşir etilmesi, analitik materiallarnıñ derce etilmesi ve ilâhre.

"İlhaq etilgen Qırım: tış siyaset ve telükesizlik siyaseti" konferentsiyası Konrad Adenauer Fondu, "Tış işler Maydanı" Fondu ve Qaradeñiz strategik araştırmalar İnstitutı tarafından teşkil olundı.


Cedvel