Facebook Telegram Twitter Instagram YouTUBE


 

Baş saife  >  Derc  >  Haberler  >  27 Qural ay 2019, 14:05

HSN: Kyivde "Hırsızlanğan Qırım. Sürgünlik ikâyesi" degen sergi yekünlendi

2019 senesi mayısnıñ 26-nda qırımtatar sürgünliginiñ 75-nci yıllığına bağışlanğan "Hırsızlanğan Qırım. Sürgünlik ikâyesi" degen sergi yekünlendi. Leyha Ukraina haber siyaseti Nazirliginiñ destegi ile ömürge keçirildi.

Serginiñ soñki kününde onı Ukraina haber siyaseti Naziriniñ Birinci muavini Emine Ceppar, qırımtatar halqı meselelerinden Ukraina Prezidentiniñ Vekâletlisi Mustafa Cemilev ve "Okean Elzı" gruppasınıñ lideri Svâtoslav Vakarçuk ziyaret ettiler.

"Qırım ve Ukrainanı birleştirgen, sürgünlik ikâyesini em malümatnen, em de duyğularnen, timsallernen ve seslernen, yarıq ve renknen köstergen küçlü leyhanıñ pek yahşı yekünlenmesi. Episi taqım içün pek yahşı bir yekün!", - dep, qayd etti E.Ceppar.

"Hırsızlanğan Qırım. Sürgünlik ikâyesi" degen sanat leyhası 11 instalâtsiyadan ibaret. Anda qırımtatar ve ukrain sanatçıları sanat ve zemaneviy dijital vastalar yardımınen ağır tarihiy vaqialarnı köstere.

"Ukrainler ve qırımtatarlarnıñ taqdirleri pek oşay. Bizni er vaqıt bir çerçive içine qoymağa tırıştılar. Tarih devamında bizlerni bastırmağa istediler. Orta Asiyağa sürgün etilgen, amma ep bir Vatanına qaytıp, medeniyetini ileriletmege devam etken halqqa büyükten büyük sayğı", - dep, paylaştı sergiden alğan teessuratlarınen S.Vakarçuk.

Leyhanıñ maqsadı - asır asırdan tekrarlanğan facialı vaqialarnı köstermek ve cezalanmağan, yeñilmegen hiyanet kene de zarar kösterip başlağanını hatırlatmaq.

Çünki 1944 senesi mayıs 18-20 künleri sovet akimiyetiniñ buyruğı boyunci bütün qırımtatar halqı Orta Asiya ve Uralğa sürgün etildi. Sürgünlikniñ birinci yıllarında halqnıñ 46,2% elâk oldı. Bu devir içinde bütün olğan medeniyet, onıñ urf-adetleri ve ananeleri yoq etildi.


Cedvel