Facebook Telegram Twitter Instagram YouTUBE


Baş saife  >  Derc  >  Haberler  >  8 Çiçek ayı 2019, 12:04

E.Ceppar: Halqara toplulıq RF-niñ kögnitiv tesirini tolusınen añlamay

2019 senesi apelniñ 5-de Ukraina haber siyaseti Naziriniñ Birinci muavini Emine Ceppar Belçikadaki Brüsselde "Torontoğa yol - Maydandan beş yıl soñra ukrain grajdan cemiyeti ve infomatsion vaziyet" (Public discussion: On the Road to Toronto – Ukraine’s Civil Society and Information Resilience Five Years After Maidan) degen munaqaşada iştirak etti.

Tedbirniñ maqsadı — melez cenk ve dezinformatsiyağa qarşılıq meselelerini muzakere etüv, em de mustaqil media vastalarına qol tutuv.

"Halqara toplulıq kögnitiv tesirlerni tolusınen körmey, tamam olarnıñ vastasınen insanlarnıñ fikirleri deñişe ve yañı baqışlar peyda ola. Tedbir çoqusı allarda kiber-komponentlikke esaslana. Faqat Ukrainanıñ tecribesi köstere ki, er şeyni qarıştırıp, em media, em ekspertlerni, em de cemaat teşkilâtlarını işletip, dünyağa ve ayrı memleketlerge tesir etken Rusiyeniñ kögnitiv cenki, pek ucuzdır. Onıñ maqsadı — nezaretni ömürge keçirmek ve "büyük Rusiye" arzularını ömürge keçirmektir", - dep, qayd etti E.Ceppar.

Öz çıqışında o, RF-niñ repressiv areketlerine ayrı diqqat ayırdı, çünki Qırımda şimdiki zamanda mustaqil jurnalistikağa yol berilmey ve episi grajdan jurnalistleri repressiyalarğa oğray.

Tedbirde Ukraina Yuqarı Şurasınıñ tış işlerden Komitet Başlığı Ganna Gopko, Avropa Parlamentiniñ deputatları, ekspertler, jurnalistler ve grajdan faalleri iştirak etti.

Halq ögündeki muzakere etüv Ukrainada islâatlardan Üçünci konferentsiyağa azırlıq çerçivesinde keçirilgen tedbirdir. Konferentsiya bu sene iyül ayında Kanadanıñ paytahtı Torontoda keçecek, onda Ukrainanıñ Baş Naziri Volodımır Groysman iştirak etecek. Tedbirni Avropa Birliginde Kanadanıñ Missiyası ve Ukraina desteklenmesinden Avropa Komissiyasınıñ Gruppası teşebbüs etti. 


Cedvel