Facebook Telegram Twitter Instagram YouTUBE


 

Baş saife  >  Derc  >  Haberler  >  27 Kiçik ay 2019, 12:02

HSN: Kiyevde "İşğal etilgen Qırım: 5 yıllıq qarşılıq" degen V Halqara forum işini başladı

2019 senesi fevralniñ 27-de Kiyevdeki Sanat Arsenalında Ukraina haber siyaseti Nazirliginen teşkil olunğan "İşğal etilgen Qırım: 5 yıllıq qarşılıq" degen Halqara Forum işini başladı.

"Rusiye Qırımnı zapt etti. Endi beş yıldan berli melez cenk aletleri yardımınen o, "serbest referendum" ve "krımnaş" şiarlarını taşığan parallel kerçekni yaratmağa tırışa. "Baht" ve "dostluqnı" sanalaştırmağa istemegen er bir insannı Rusiye çekiştirüvler, qaçıruvlar, öldürüvler, tintüvler ve tevqif etilüvlernen cezalay. HSN endi beş yıldan berli keçirgen Halqara Forum ukrain cemiyeti, halqara toplulıqnı ve Qırım sakinlerini bir arağa ketirgen meydan ola", - dep, qayd etti tedbirniñ açılışı vaqtında Ukraina haber siyaseti Naziriniñ Birinci muavini Emine Ceppar.

Ukraina Baş-Naziri Volodımır Groysman da çıqışnen bulunğanda, qayd etkenine köre, Ukraina rusiye tecavuzına, ukrain topraqlarınıñ işğal etilmesine qarşılıq köstere, onıñ içün Ukrainanıñ yarımadanen birleşmesi künü yaqınlaşmaqta.

"Biz unutmaymız ve Qırımnıñ Rusiye işğalinden azat etilüv kününi nasıl etip yaqınlaştırabilecegimizni tüşünemiz. Buña irişecekmiz. Ukrainanıñ Qırım yarımadası musafirçen kurort ve devletimizniñ incisi olacaq", - dep, qayd etti ükümet başlığı.

Bundan ğayrı, tedbirniñ başında AQŞ Devlet Departamentiniñ Ukraina meselelerinden Mahsus temsilcisi Kurt Uolker de musafirlerge muracaat sözünen bulundı.


Cedvel