Facebook Telegram Twitter Instagram YouTUBE


Baş saife  >  Derc  >  Haberler  >  30 Arman ayı 2018, 13:08

E.Ceppar MAN yaz mektebiniñ "Qırımtatar gumanitaristikası" sektsiyasınıñ iştirakçilerinen körüşti

2018 senesi avgustnıñ 29-da "Ükrinform" haber agentliginde Ukraina kiçik ilimler akademiyası Yaz mektebiniñ "Qırımtatar gumanitaristikası" sektsiyasınıñ iştirakçilerinen körüşüv keçti. Tedbir Ukraina haber siyaseti Nazirliginiñ destegi ile teşkil olundı.

Ukraina haber siyaseti Naziriniñ Birinci muavini Emine Ceppar ve Ukraina medeniyet Naziriniñ Qırım meselelerinden mesleatçısı Esma Aciyeva balalarnen olarnıñ qırımtatar medeniyeti ve tarihına bağışlanğan ilmiy işlerini muzakere etti. Balalarnıñ bir qısmı ilhaq etilgen Qırımdan kelgen.

Emine Ceppar balalarğa Qırımnıñ informatsion reintegratsiyası saasında HSN-nıñ faaliyeti aqqında aytıp berdi ve balalarğa araştırmalarında muvafaqiyetler tiledi.

"Keçken sene ilk kere Kiçik ilimler akademiyasınıñ "Qırımtatar gumanitaristikası" sektsiyası çalışıp başladı. Bu da Qırım tamır halqı boyunca müim bir adımdır. Halqnıñ intelektual inkişafı ve, netice olaraq, özgünliginiñ arttırılması, ilhaq şaraitinde imkânsızdır. Rusiyeniñ imperatorlıq siyaseti bunı közde tutmay. Ukraina ise, aksine, ilhaq etilgen territoriyalarda vatandaşlarına qol tutmaq içün elinden kelgenini yapa. Böyle leyhalar tamam bunı tasdıqlay — olar Rusiye yoq etmege istegen fizik bağlarnıñ saqlanılması aqqında", - dep qayd etti Birinci Nazir muavini.

MAN iştirakçileriniñ ilmiy araştırmaları pek farqlı — qırımtatar adetleri, qırımtatar edebiyatınıñ tarihı, ananeviy horeografiya ve Qırım Hanlığı devriniñ muzıkal aletleri, qırımtatar yemekleri, evlerniñ donatmaları ve ilâhre.

Ukraina kiçik ilimler akademiyasında "Qırımtatar gumanitaristikası" sektsiyası 2017 senesi dekabr ayında açıldı. O, bütün Ukrainadan kelgen yaşlarnı birleştire. Esas maqsat — qırımtatar tili, medeniyeti, tarihı ve sanatı saasında bilgilerniñ arttıruvı.


Cedvel