Facebook Telegram Twitter Instagram YouTUBE


Baş saife  >  Derc  >  Haberler  >  31 Oraq ayı 2018, 09:07

Ukraina haber siyaseti Nazirligi Köllegiyasınıñ toplaşuvı keçti

2018 senesi iyülniñ 30-da Ükümet evi binasında Ukraina haber siyaseti Nazirliginiñ Köllegiya toplaşuvı keçti.

Kiriş sözünde Ukraina vitse-baş-naziri Pavlo Rozenko HSN-niñ eñ müim irişmeleri arasında Donetsk ve Luansk vilâyetleriniñ informatsion reintegratsiyası Strategiyasınıñ qabul etilmesini; telequlleler qurulmasını; yoldaş ve kabel ağlarınıñ arttırılmasını; “Ukraine NOW” degen yekâne Ukraina brendiniñ işlep çıqarılmasını ve keyfiyetli köntent yaratılmasını, hususan, bir çoq halqara kinofestivallerde taqdim etilgen “Dâkuyu” filminiñ çıqarılmasını qayd etti.

“Nazirlik artıq pek müim iş yaptı, amma ileride de daa çoq vazife bar ve olarnı daa tez sürette becermege kerek”, - dep, qayd etti Vitse-baş-nazir.
Söz serbestligi ve informatsion siyaset meselelerden Ukraina Yuqarı Şurasınıñ komitet başlığı Viktoriya Sümar qayd etkeine köre, rusiye tecavuzına daa çoq qarşılıq köstermege kerek, hususan halqara meydanda. “Bugun Ukrainada kerçek olaylarnı dünyağa açıqlamağa - borcumız. Bizde grajdan cenki degil de, Rusiye Federatsiyası tarafından tecavuz olğanını köstermelimiz”, - dep qoştı o.

Oturışuv vaqtında Ukraina haber siyaseti Nazirliginiñ reberligi Qırım ve Donbass haber reintegratsiyası, avropa integratsiyası, Haber telükesizligi Mezebiniñ kirsetilmesi, halqara işbirlik, strategik araştırmalar, dünyada Ukraina populârlaşması, tış yayınlav sistemasınıñ inkişafı ve umummilliy kommunikatsion kampaniyalar keçirilmesi saalarında faaliyet neticelerini taqdim etti.

Ukraina haber siyaseti Naziriniñ Birinci muavini Emine ceppar HSN-niñ muvafaqiyetli leyhalarını çoqlaştırmaq içün devlet bücetinden maaliye ayırılmasınıñ arttırılması kerekligini qayd etti. “Bizge qarşı aktiv informatsion cenk alıp barıla, tecavuzcı oña milyarnen dollar ayıra. Biz de özümizni qorumaq içün azır olmalımız”, - dep, qayd etti o.

Haber siyaseti Naziriniñ muavini Dmıtro Zolotuhin informatsion telükelerge effektiv qarşılıq köstermek içün halqara ortaqlarnen areketler birleşmesiniñ ve devlet arasında idarelerara koordinatsiyanıñ müimligini qayd etti.

Öz nevbetinde HSN-niñ devlet kâtibi Artem Bidenko qayd etkenine köre, Nazirlik işinde açıqlıq, aydınlıq ve informatsion saada leyhalarnı muvafaqiyetli ömürge keçirgen keyfiyetli protseduralar qurulmasınıñ printsiplerine esaslana.

Siyasiy ilimler doktorı, Halqara munasebetler institutında halqara mediakommunikatsiyalar ve kommunikativ tehnologiyalar kafedrasınıñ dotsenti Sergiy Danılenko Nazirlik yanında Ekspert Şurasınıñ işi aqqında esabatnı taqdim etti. Onıñ sözlerine köre, HSN qararlar çıqarğanda, daima eñ keniş ekspertler sırasınen işbirlikte buluna.

Bundan ğayrı, Köllegiyada HSN yanında Studentler Şurasınıñ esabatı ve Donbassnen Qırımda vaziyet açıqlanılmasından nezaret neticeleri taqdim etildi.

Oturışuvda Televizion ve radioyayınlav meselelerinden Milliy Şura başlığı Yuriy Artemenko, Milliy Şura muavini Ulâna Feşçuk, Milliy Şura azası Sergiy Kostınskıy, Televizion ve raioyayınlav meselelerinden Devlet komitetiniñ başlığı Oleg Nalıvayko, halq deputatları, alimler, mediatoplulıq ve grajdan cemiyetiniñ vekilleri iştirak etti.
Köllegiya azaları 2017 senesi episi yönelişlerde Ukraina haber siyaseti Nazirliginiñ effektiv faaliyeti boyunca qararğa episi qol tuttı.


Cedvel