Facebook Telegram Twitter Instagram YouTUBE


Baş saife  >  Derc  >  Haberler  >  27 Çiçek ayı 2018, 16:04

E.Ceppar: Qırımtatar halqına qarşı cinayetler rusiye akimiyeti içün alışılğan

2018 senesi aprelniñ 27-de “Ukrinform” haber agentliginiñ matbuat merkezinde “1944 senesi qırımtatar halqı sürgünliginiñ tahqiq etilüvi: problemler ve perspektivalar” mevzusında tögerek masa keçti. Tedbir Ukraina haber siyaseti Nazirliginiñ destegi ile “Qırımtatar resurs merkezi” cemaat teşkilâtınen teşkil olundı.

“1944 senesi qırımtatar halqınıñ sürgün etilmesi - bu, sıñırı olmağan cinayettir. Şimdi Qırımdaki vaziyet - bu, stalin zamanlarınıñ devamı. Qırımtatarlar kene de sıqıştırıla ve yoq etilüv telükesi altında buluna”, - dep qayd etti Ukraina haber siyaseti Naziriniñ Birinci muavini Emine Ceppar.
Rusiye tarafından qırımtatarlarğa qarşı repressiyalar daa 1783 senesi Rusiye imperatorlığınen Qırımnıñ birinci işğali vaqtında başlandı, ve bunıñ neticesinde, qırımtatarlarnıñ birde üç qısmı yarımadanı terk etmege mecbur oldı, dep qoştı Emine Ceppar.

“Bu cinayetler, tarihiy devirlerge ve idare şekillerine baqmadan, Rusiye içün alışqın. Bu - ukrain, qırımtatar ya da başqa bir milletlerge çarlıq munasebetidir. Şimdi de ukrainler, qırımtatarlarnen beraberlikte özgürlikke aqqı içün küreşmek kerek”, - dep, yekünledi E.Ceppar.
Tögerek masada Milliy Meclis azaları, “Qırımtatar resurs merkezi” cemaat teşkilâtınıñ başlığı Eskender Bariyev, qırım tarihçısı, Ukraina PEN-klubınıñ azası Gülnara Bekirova, Ukraina halq deputatı Mıkola Knâjıtskıy ve başqa siyasiy ve cemaat erbapları iştirak etti.
Tedbir vaqtında “1944 genotsidiniñ şaatları” vesiqalı filmi taqdim etildi.
Hatırlatamız, 1944 senesi mayıs 18-21 künleri Stalinniñ emirinen Qırımdan 191 biñden ziyade qırımtatarı Orta Asiya ve Ural taraflarına sürgün etildi.


Cedvel